అర్జునవిషాదయోగో నామ ప్రథమోఽధ్యాయః ॥ 1 ॥ 

సీదంతి మమ గాత్రాణి ముఖం చ పరిశుష్యతి । 
వేపథుశ్చ శరీరే మే రోమహర్షశ్చ జాయతే ॥  1-29 ॥ 


సాంఖ్యయోగో నామ ద్వితీయోఽధ్యాయః ॥ 2 ॥  
	
కుతస్త్వా కశ్మలమిదం విషమే సముపస్థితమ్ । 
అనార్యజుష్టమస్వర్గ్యమకీర్తికరమర్జున ॥  2-2 ॥ 

క్లైబ్యం మా స్మ గమః పార్థ నైతత్త్వయ్యుపపద్యతే । 
క్షుద్రం హృదయదౌర్బల్యం త్యక్త్వోత్తిష్ఠ పరంతప ॥  2-3 ॥ 

కార్పణ్యదోషోపహతస్వభావః పృచ్ఛామి త్వాం ధర్మసంమూఢచేతాః	। 
యచ్ఛ్రేయః స్యాన్నిశ్చితం బ్రూహి తన్మే శిష్యస్తేఽహం శాధి మాం త్వాం ప్రపన్నమ్ ॥  2-7 ॥ 

నాసతో విద్యతే భావో నాభావో విద్యతే సతః । 
ఉభయోరపి దృష్టోఽన్తస్త్వనయోస్తత్త్వదర్శిభిః ॥  2-16 ॥ 

అవ్యక్తాదీని భూతాని వ్యక్తమధ్యాని భారత । 
అవ్యక్తనిధనాన్యేవ తత్ర కా పరిదేవనా ॥  2-28 ॥ 

హతో వా ప్రాప్స్యసి స్వర్గం జిత్వా వా భోక్ష్యసే మహీమ్ । 
తస్మాదుత్తిష్ఠ కౌంతేయ యుద్ధాయ కృతనిశ్చయః ॥  2-37 ॥ 

సుఖదుఃఖే సమే కృత్వా లాభాలాభౌ జయాజయౌ । 
తతో యుద్ధాయ యుజ్యస్వ నైవం పాపమవాప్స్యసి ॥  2-38 ॥ 

యావానర్థ ఉదపానే సర్వతః సంప్లుతోదకే । 
తావాన్సర్వేషు వేదేషు బ్రాహ్మణస్య విజానతః ॥  2-46 ॥ 

కర్మణ్యేవాధికారస్తే మా ఫలేషు కదాచన । 
మా కర్మఫలహేతుర్భూర్మా తే సంగోఽస్త్వకర్మణి ॥  2-47 ॥ 

యోగస్థః కురు కర్మాణి సంగం త్యక్త్వా ధనంజయ । 
సిద్ధ్యసిద్ధ్యోః సమో భూత్వా సమత్వం యోగ ఉచ్యతే ॥  2-48 ॥ 

బుద్ధియుక్తో జహాతీహ ఉభే సుకృతదుష్కృతే । 
తస్మాద్యోగాయ యుజ్యస్వ యోగః కర్మసు కౌశలమ్ ॥  2-50 ॥ 

స్థితప్రజ్ఞస్య కా భాషా సమాధిస్థస్య కేశవ । 
స్థితధీః కిం ప్రభాషేత కిమాసీత వ్రజేత కిమ్ ॥  2-54 ॥ 

ఆత్మన్యేవాత్మనా తుష్టః స్థితప్రజ్ఞస్తదోచ్యతే ॥  2-55 ॥ 

దుఃఖేష్వనుద్విగ్నమనాః సుఖేషు విగతస్పృహః । 
వీతరాగభయక్రోధః స్థితధీర్మునిరుచ్యతే ॥  2-56 ॥ 

యః సర్వత్రానభిస్నేహస్తత్తత్ప్రాప్య శుభాశుభమ్ । 
నాభినందతి న ద్వేష్టి తస్య ప్రజ్ఞా ప్రతిష్ఠితా ॥  2-57 ॥ 

ప్రసాదే సర్వదుఃఖానాం హానిరస్యోపజాయతే । 
ప్రసన్నచేతసో హ్యాశు బుద్ధిః పర్యవతిష్ఠతే ॥  2-65 ॥ 

యా నిశా సర్వభూతానాం తస్యాం జాగర్తి సంయమీ । 
యస్యాం జాగ్రతి భూతాని సా నిశా పశ్యతో మునేః ॥  2-69 ॥ 


కర్మయోగో నామ తృతీయోఽధ్యాయః ॥ 3 ॥  

వ్యామిశ్రేణేవ వాక్యేన బుద్ధిం మోహయసీవ మే । 
తదేకం వద నిశ్చిత్య యేన శ్రేయోఽహమాప్నుయామ్ ॥  3-2 ॥ 

న హి కశ్చిత్క్షణమపి జాతు తిష్ఠత్యకర్మకృత్ । 
కార్యతే హ్యవశః కర్మ సర్వః ప్రకృతిజైర్గుణైః ॥  3-5 ॥ 

అన్నాద్భవంతి భూతాని పర్జన్యాదన్నసంభవః । 
యజ్ఞాద్భవతి పర్జన్యో యజ్ఞః కర్మసముద్భవః ॥  3-14 ॥ 

కర్మ బ్రహ్మోద్భవం విద్ధి బ్రహ్మాక్షరసముద్భవమ్ । 
తస్మాత్సర్వగతం బ్రహ్మ నిత్యం యజ్ఞే ప్రతిష్ఠితమ్ ॥  3-15 ॥ 

ఏవం ప్రవర్తితం చక్రం నానువర్తయతీహ యః । 
అఘాయురింద్రియారామో మోఘం పార్థ స జీవతి ॥  3-16 ॥ 

యద్యదాచరతి శ్రేష్ఠస్తత్తదేవేతరో జనః । 
స యత్ప్రమాణం కురుతే లోకస్తదనువర్తతే ॥  3-21 ॥ 

న మే పార్థాస్తి కర్తవ్యం త్రిషు లోకేషు కించన । 
నానవాప్తమవాప్తవ్యం వర్త ఏవ చ కర్మణి ॥  3-22 ॥ 

యది హ్యహం న వర్తేయం జాతు కర్మణ్యతంద్రితః । 
మమ వర్త్మానువర్తంతే మనుష్యాః పార్థ సర్వశః ॥  3-23 ॥ 

సక్తాః కర్మణ్యవిద్వాంసో యథా కుర్వంతి భారత । 
కుర్యాద్విద్వాంస్తథాసక్తశ్చికీర్షుర్లోకసంగ్రహమ్ ॥  3-25 ॥ 

ప్రకృతేర్గుణసంమూఢాః సజ్జంతే గుణకర్మసు । 
తానకృత్స్నవిదో మందాన్కృత్స్నవిన్న విచాలయేత్ ॥  3-29 ॥ 

శ్రేయాన్స్వధర్మో విగుణః పరధర్మాత్స్వనుష్ఠితాత్ । 
స్వధర్మే నిధనం శ్రేయః పరధర్మో భయావహః ॥  3-35 ॥ 


జ్ఞానకర్మసంన్యాసయోగో నామ చతుర్థోఽధ్యాయః ॥ 4 ॥ 

యదా యదా హి ధర్మస్య గ్లానిర్భవతి భారత । 
అభ్యుత్థానమధర్మస్య తదాత్మానం సృజామ్యహమ్ ॥  4-7 ॥ 

పరిత్రాణాయ సాధూనాం వినాశాయ చ దుష్కృతామ్ । 
ధర్మసంస్థాపనార్థాయ సంభవామి యుగే యుగే ॥  4-8 ॥ 

జన్మ కర్మ చ మే దివ్యమేవం యో వేత్తి తత్త్వతః । 
త్యక్త్వా దేహం పునర్జన్మ నైతి మామేతి సోఽర్జున ॥  4-9 ॥ 

వీతరాగభయక్రోధా మన్మయా మాముపాశ్రితాః । 
బహవో జ్ఞానతపసా పూతా మద్భావమాగతాః ॥  4-10 ॥ 

యే యథా మాం ప్రపద్యంతే తాంస్తథైవ భజామ్యహమ్ । 
మమ వర్త్మానువర్తంతే మనుష్యాః పార్థ సర్వశః ॥  4-11 ॥ 

చాతుర్వర్ణ్యం మయా సృష్టం గుణకర్మవిభాగశః । 
తస్య కర్తారమపి మాం విద్ధ్యకర్తారమవ్యయమ్ ॥  4-13 ॥ 


కర్మసంన్యాసయోగో నామ పంచమోఽధ్యాయః ॥ 5 ॥ 

నాదత్తే కస్యచిత్పాపం న చైవ సుకృతం విభుః । 
అజ్ఞానేనావృతం జ్ఞానం తేన ముహ్యంతి జంతవః ॥  5-15 ॥ 

విద్యావినయసంపన్నే బ్రాహ్మణే గవి హస్తిని । 
శుని చైవ శ్వపాకే చ పండితాః సమదర్శినః ॥  5-18 ॥ 


ఆత్మసంయమయోగో నామ షష్ఠోఽధ్యాయః ॥ 6 ॥ 

ఉద్ధరేదాత్మనాత్మానం నాత్మానమవసాదయేత్ । 
ఆత్మైవ హ్యాత్మనో బంధురాత్మైవ రిపురాత్మనః ॥  6-5 ॥ 

బంధురాత్మాత్మనస్తస్య యేనాత్మైవాత్మనా జితః । 
అనాత్మనస్తు శత్రుత్వే వర్తేతాత్మైవ శత్రువత్ ॥  6-6 ॥ 

యుక్తాహారవిహారస్య యుక్తచేష్టస్య కర్మసు । 
యుక్తస్వప్నావబోధస్య యోగో భవతి దుఃఖహా ॥  6-17 ॥ 

సర్వభూతస్థమాత్మానం సర్వభూతాని చాత్మని । 
ఈక్షతే యోగయుక్తాత్మా సర్వత్ర సమదర్శనః ॥  6-29 ॥ 

యో మాం పశ్యతి సర్వత్ర సర్వం చ మయి పశ్యతి । 
తస్యాహం న ప్రణశ్యామి స చ మే న ప్రణశ్యతి ॥  6-30 ॥ 

ఆత్మౌపమ్యేన సర్వత్ర సమం పశ్యతి యోఽర్జున । 
సుఖం వా యది వా దుఃఖం స యోగీ పరమో మతః ॥  6-32 ॥ 

అసంశయం మహాబాహో మనో దుర్నిగ్రహం చలమ్ । 
అభ్యాసేన తు కౌంతేయ వైరాగ్యేణ చ గృహ్యతే ॥  6-35 ॥ 

పార్థ నైవేహ నాముత్ర వినాశస్తస్య విద్యతే । 
న హి కల్యాణకృత్కశ్చిద్దుర్గతిం తాత గచ్ఛతి ॥  6-40 ॥ 


జ్ఞానవిజ్ఞానయోగో నామ సప్తమోఽధ్యాయః ॥ 7 ॥ 

జ్ఞానం తేఽహం సవిజ్ఞానమిదం వక్ష్యామ్యశేషతః । 
యజ్జ్ఞాత్వా నేహ భూయోఽన్యజ్జ్ఞాతవ్యమవశిష్యతే ॥  7-2 ॥ 

మనుష్యాణాం సహస్రేషు కశ్చిద్యతతి సిద్ధయే । 
యతతామపి సిద్ధానాం కశ్చిన్మాం వేత్తి తత్త్వతః ॥  7-3 ॥ 

ఏతద్యోనీని భూతాని సర్వాణీత్యుపధారయ । 
అహం కృత్స్నస్య జగతః ప్రభవః ప్రలయస్తథా ॥  7-6 ॥ 

మత్తః పరతరం నాన్యత్కించిదస్తి ధనంజయ । 
మయి సర్వమిదం ప్రోతం సూత్రే మణిగణా ఇవ ॥  7-7 ॥ 

బీజం మాం సర్వభూతానాం విద్ధి పార్థ సనాతనమ్ । 
బుద్ధిర్బుద్ధిమతామస్మి తేజస్తేజస్వినామహమ్ ॥  7-10 ॥ 

చతుర్విధా భజంతే మాం జనాః సుకృతినోఽర్జున । 
ఆర్తో జిజ్ఞాసురర్థార్థీ జ్ఞానీ చ భరతర్షభ ॥  7-16 ॥ 



అక్షరబ్రహ్మయోగో నామాష్టమోఽధ్యాయః ॥ 8 ॥ 

ఓమిత్యేకాక్షరం బ్రహ్మ వ్యాహరన్మామనుస్మరన్ । 
యః ప్రయాతి త్యజందేహం స యాతి పరమాం గతిమ్ ॥  8-13 ॥ 


రాజవిద్యారాజగుహ్యయోగో నామ నవమోఽధ్యాయః ॥ 9 ॥  

అహం క్రతురహం యజ్ఞః స్వధాహమహమౌషధమ్ । 
మంత్రోఽహమహమేవాజ్యమహమగ్నిరహం హుతమ్ ॥  9-16 ॥ 

పితాహమస్య జగతో మాతా ధాతా పితామహః । 
వేద్యం పవిత్రమోంకార ఋక్సామ యజురేవ చ ॥  9-17 ॥ 

గతిర్భర్తా ప్రభుః సాక్షీ నివాసః శరణం సుహృత్ । 
ప్రభవః ప్రలయః స్థానం నిధానం బీజమవ్యయమ్ ॥  9-18 ॥ 

అనన్యాశ్చింతయంతో మాం యే జనాః పర్యుపాసతే । 
ఏషాం నిత్యాభియుక్తానాం యోగక్షేమం వహామ్యహమ్ ॥  9-22॥  

మన్మనా భవ మద్భక్తో మద్యాజీ మాం నమస్కురు । 
మామేవైష్యసి యుక్త్వైవమాత్మానం మత్పరాయణః ॥  9-34 ॥ 


విభూతియోగో నామ దశమోఽధ్యాయః ॥ 10 ॥ 

అహింసా సమతా తుష్టిస్తపో దానం యశోఽయశః । 
భవంతి భావా భూతానాం మత్త ఏవ పృథగ్విధాః ॥  10-5 ॥ 

అహమాత్మా గుడాకేశ సర్వభూతాశయస్థితః । 
అహమాదిశ్చ మధ్యం చ భూతానామంత ఏవ చ ॥  10-20 ॥ 

ఆదిత్యానామహం విష్ణుర్జ్యోతిషాం రవిరంశుమాన్ । 
మరీచిర్మరుతామస్మి నక్షత్రాణామహం శశీ ॥  10-21 ॥ 

వేదానాం సామవేదోఽస్మి దేవానామస్మి వాసవః । 
ఇంద్రియాణాం మనశ్చాస్మి భూతానామస్మి చేతనా ॥  10-22 ॥ 

రుద్రాణాం శంకరశ్చాస్మి విత్తేశో యక్షరక్షసామ్ । 
వసూనాం పావకశ్చాస్మి మేరుః శిఖరిణామహమ్ ॥  10-23 ॥ 

అశ్వత్థః సర్వవృక్షాణాం దేవర్షీణాం చ నారదః । 
గంధర్వాణాం చిత్రరథః సిద్ధానాం కపిలో మునిః ॥  10-26 ॥ 

ప్రహ్లాదశ్చాస్మి దైత్యానాం కాలః కలయతామహమ్ । 
మృగాణాం చ మృగేంద్రోఽహం వైనతేయశ్చ పక్షిణామ్ ॥  10-30 ॥ 

ద్యూతం ఛలయతామస్మి తేజస్తేజస్వినామహమ్ । 
జయోఽస్మి వ్యవసాయోఽస్మి సత్త్వం సత్త్వవతామహమ్ ॥  10-36 ॥ 

దండో దమయతామస్మి నీతిరస్మి జిగీషతామ్ । 
మౌనం చైవాస్మి గుహ్యానాం జ్ఞానం జ్ఞానవతామహమ్ ॥  10-38 ॥ 

యచ్చాపి సర్వభూతానాం బీజం తదహమర్జున । 
న తదస్తి వినా యత్స్యాన్మయా భూతం చరాచరమ్ ॥  10-39 ॥ 

నాంతోఽస్తి మమ దివ్యానాం విభూతీనాం పరంతప । 
ఏష తూద్దేశతః ప్రోక్తో విభూతేర్విస్తరో మయా ॥  10-40 ॥ 

యద్యద్విభూతిమత్సత్త్వం శ్రీమదూర్జితమేవ వా । 
తత్తదేవావగచ్ఛ త్వం మమ తేజోంఽశసంభవమ్ ॥  10-41 ॥ 


విశ్వరూపదర్శనయోగో నామైకాదశోఽధ్యాయః ॥ 11 ॥  

న తు మాం శక్యసే ద్రష్టుమనేనైవ స్వచక్షుషా । 
దివ్యం దదామి తే చక్షుః పశ్య మే యోగమైశ్వరమ్ ॥  11-8 ॥ 

దివి సూర్యసహస్రస్య భవేద్యుగపదుత్థితా । 
యది భాః సదృశీ సా స్యాద్భాసస్తస్య మహాత్మనః ॥  11-12 ॥ 

పశ్యామి దేవాంస్తవ దేవ దేహే సర్వాంస్తథా భూతవిశేషసంఘాన్	। 
బ్రహ్మాణమీశం కమలాసనస్థమృషీంశ్చ సర్వానురగాంశ్చ దివ్యాన్ ॥  11-15 ॥ 

అనేకబాహూదరవక్త్రనేత్రం పశ్యామి త్వాం సర్వతోఽనంతరూపమ్	। 
నాంతం న మధ్యం న పునస్తవాదిం పశ్యామి విశ్వేశ్వర విశ్వరూప ॥  11-16 ॥ 

ద్యావాపృథివ్యోరిదమంతరం హి వ్యాప్తం త్వయైకేన దిశశ్చ సర్వాః	। 
దృష్ట్వాద్భుతం రూపముగ్రం తవేదం లోకత్రయం ప్రవ్యథితం మహాత్మన్ ॥  11-20 ॥ 

అమీ హి త్వాం సురసంఘా విశంతి కేచిద్భీతాః ప్రాంజలయో గృణంతి	। 
స్వస్తీత్యుక్త్వా మహర్షిసిద్ధసంఘాః స్తువంతి త్వాం స్తుతిభిః పుష్కలాభిః ॥  11-21 ॥ 

దంష్ట్రాకరాలాని చ తే ముఖాని దృష్ట్వైవ కాలానలసంనిభాని	। 
దిశో న జానే న లభే చ శర్మ ప్రసీద దేవేశ జగన్నివాస ॥  11-25 ॥ 

వక్త్రాణి తే త్వరమాణా విశంతి దంష్ట్రాకరాలాని భయానకాని	। 
కేచిద్విలగ్నా దశనాంతరేషు సందృశ్యంతే చూర్ణితైరుత్తమాంగైః ॥  11-27 ॥ 

నమః పురస్తాదథ పృష్ఠతస్తే నమోఽస్తు తే సర్వత ఏవ సర్వ	। 
అనంతవీర్యామితవిక్రమస్త్వం సర్వం సమాప్నోషి తతోఽసి సర్వః ॥  11-40 ॥ 

సఖేతి మత్వా ప్రసభం యదుక్తం హే కృష్ణ హే యాదవ హే సఖేతి	। 
అజానతా మహిమానం తవేదం మయా ప్రమాదాత్ప్రణయేన వాపి ॥  11-41 ॥ 


భక్తియోగో నామ ద్వాదశోఽధ్యాయః ॥ 12 ॥ 

యస్మాన్నోద్విజతే లోకో లోకాన్నోద్విజతే చ యః । 
హర్షామర్షభయోద్వేగైర్ముక్తో యః స చ మే ప్రియః ॥  12-15 ॥ 

యో న హృష్యతి న ద్వేష్టి న శోచతి న కాంక్షతి । 
శుభాశుభపరిత్యాగీ భక్తిమాన్యః స మే ప్రియః ॥  12-17 ॥ 


క్షేత్రక్షేత్రజ్ఞవిభాగయోగో నామ త్రయోదశోఽధ్యాయః ॥ 13 ॥ 

సర్వతఃపాణిపాదం తత్సర్వతోఽక్షిశిరోముఖమ్ । 
సర్వతఃశ్రుతిమల్లోకే సర్వమావృత్య తిష్ఠతి ॥  13-13 ॥ 

బహిరంతశ్చ భూతానామచరం చరమేవ చ । 
సూక్ష్మత్వాత్తదవిజ్ఞేయం దూరస్థం చాంతికే చ తత్ ॥  13-15 ॥ 

అవిభక్తం చ భూతేషు విభక్తమివ చ స్థితమ్ । 
భూతభర్తృ చ తజ్జ్ఞేయం గ్రసిష్ణు ప్రభవిష్ణు చ ॥  13-16 ॥ 


గుణత్రయవిభాగయోగో నామ చతుర్దశోఽధ్యాయః ॥ 14 ॥ 

సర్వయోనిషు కౌంతేయ మూర్తయః సంభవంతి యాః । 
తాసాం బ్రహ్మ మహద్యోనిరహం బీజప్రదః పితా ॥  14-4 ॥ 


పురుషోత్తమయోగో నామ పంచదశోఽధ్యాయః ॥ 15 ॥ 

ఊర్ధ్వమూలమధఃశాఖమశ్వత్థం ప్రాహురవ్యయమ్ । 
ఛందాంసి యస్య పర్ణాని యస్తం వేద స వేదవిత్ ॥  15-1 ॥ 


శ్రద్ధాత్రయవిభాగయోగో నామ సప్తదశోఽధ్యాయః ॥ 17 ॥ 

ఓం తత్సదితి నిర్దేశో బ్రహ్మణస్త్రివిధః స్మృతః । 
బ్రాహ్మణాస్తేన వేదాశ్చ యజ్ఞాశ్చ విహితాః పురా ॥  17-23 ॥ 


మోక్షసంన్యాసయోగో నామాష్టాదశోఽధ్యాయః ॥  18 ॥ 

సహజం కర్మ కౌంతేయ సదోషమపి న త్యజేత్ । 
సర్వారంభా హి దోషేణ ధూమేనాగ్నిరివావృతాః ॥  18-48 ॥ 

ఈశ్వరః సర్వభూతానాం హృద్దేశేఽర్జున తిష్ఠతి । 
భ్రామయన్సర్వభూతాని యంత్రారూఢాని మాయయా ॥  18-61 ॥ 

సర్వధర్మాన్పరిత్యజ్య మామేకం శరణం వ్రజ । 
అహం త్వా సర్వపాపేభ్యో మోక్షయిష్యామి మా శుచః ॥  18-66 ॥ 

నష్టో మోహః స్మృతిర్లబ్ధా త్వత్ప్రసాదాన్మయాచ్యుత । 
స్థితోఽస్మి గతసందేహః కరిష్యే వచనం తవ ॥  18-73 ॥ 

యత్ర యోగేశ్వరః కృష్ణో యత్ర పార్థో ధనుర్ధరః । 
తత్ర శ్రీర్విజయో భూతిర్ధ్రువా నీతిర్మతిర్మమ ॥  18-78 ॥